Per si sourtì dau gris dòu cada jour, per soudisfaire d’envuèia escoundudi que mitounon plan-planin en un cantoun dei pensié, per supourtà un malan, per implourà una gracia, per si desfendre contra d’una injusticia, magara contre d’un ordre establit, si fa festa

E la festa si fa en chanjant lu vestit que pouodon devenì magnificou couma tant ben estrassat e rançous.

Si chanja de cara que pòuodon estre belamen enfardadi couma mascaradi au pounch de perdre l’identità.

Si chanja lu ourari : si fa d’aubada couma de revelhoun, si passa la nuèch sensa per autant si repauva de jour.

Si chanja li vous que van estre crit couma cant, seducioun couma menaça, pouesia couma tapoul.

Si roumpe lou silenci : bousin couma mùsica, couma cacoufounìa van emplì l’espaci.

Si chanja lu gest que seran gesticulacioun o dansa graciouha, caressa d’amour couma brutalità, embrassada couma chacoutada.

Si fabreja de persounage, d’ouget, de decorou qu’esprimeran la bèutà e la bountà couma l’ourrour e lou malefici, una voulountà de caricicatura gentila couma de prouvoucacioun.

L’isoulamen, la soulituda si trisson, l’acampada si fourma e la foga si founde en una ceremonia doun lou religious e lou pagan, souventi fes, si mesclon.

Lou saben, ailas, la vida noun es toujou festa… Ma la festa es vida e se lu evenimen urous, naturalamen si feston, davant dòu malur, davant de la mouort, couma en un desfit, la festa countinua !

Raoul NATHIEZ
Diretour de la Redacioun