Noun si pòu evoucà lou periodou que ven après l’Anessioun de Nissa à la França sensa parlà de l’Identità nissarda. D’efet, soun lu cinc sècoulou d’istòria coumuna embé la Maioun de Savòia qu’an bastit per la maja part aquela Identità. Sensa la Dedicioun dóu 1388, Nissa noun serìa qu’una partida de Prouvença, e dounca francesa despì lou 1481. Lou siéu carater particulié, la siéu spechificità si soun bastit embé lou cement de l’apartenença au pais sàrdou e, couma lou Pimount o la Savòia, en veritable coumpàgnou

Lou sistèma francès per integrà prouverà de metre souta-soubre lou prencipi meme d’aquela relacioun. Lou mantenimen de l’Identità, qu’èra facil da preservà quoura si pauvava soulamen la questioun de la fidelità à la Maioun sarda, deven deficultous e esquasi empoussible embé la voulountà de metre en counfourmità lu abitant de la Coumtèa. Sigue embé l’ensegnamen, teriblamen eficache, que menerà à ignourà coumpletamen la lenga nouòstra, e meme à l’interdire à l’escola e à escoundre una part de l’istòria de la Coumtèa, sigue embé l’adesioun e souventi fès lou changiamen d’idèa dei ome poulitic, lou relarc nissart es foundut dins la forma francesa.

Mà cau pilha garda qu’aquéu pounch de vista identitari noun n’escounde l’aspet pousitiéu dóu changiamen. Fouguet en grana part econòmicou, perqué lou Pais nissart rajougnava una França stabla e en plena espansioun. Nissa e lou siéu relarc li van aquistà una ourganisacioun econòmica que, ben vitou, li permetrà de devenì lou pais d’aculhimen privilegiat dei Euroupenc lu mai ric.

Mà lou pres à pagà fouguet, sensa countradicioun, un adeblimen dóu sentimen identitari.

da Rougié ROCCA

Diretour ajount de la Revista